Talaaq _Islami nuqta-e- nazar:Shari’at mein nikah ek qabil-eihtiram aur muqaddas rishta hai, Islam chahta hai keh jis mard-o-aurat ne nikah ki surat mein ek saath zindagi basar karne aur ek dusre ke saathi bankar rehne ka ahad kiya hai.
Woh is par hamesha qayim rahein aur mamuli mamuli baton aur choti choti uljhanon mein ulajh kar is rishte ki mazboot bunyadon ko mismaar na karein.
Quran-e-majeed ne miyan biwi ke rishte ko ek dusre ke liye sukoon ka zariya aur ek dusre ke liye libaas qaraar diya hai.
Jis tarha libaas insani jism ka sab se bada hum raaz, takleef-o-aaram ka saathi aur muhafiz hota hai, isi tarha miyan biwi ek dusre ke hum raaz aur unki aapasi kamzoriyon par parda dalne wale aur har haal mein ek dusre ke rafeeq hote hain.
Islam mein nikah ko badi azmat hai
Islam mein nikah ko badi azmat hasil hai, isliye keh nikah iffat-o-paak damani ka baa’is hai, do ajnabi khandan ek dusre se qareeb hote hain aur unke darmiyan mahabbat-o-ulfat paida hoti hai.
Khuda na khasta agar yeh rishta tot’ta hai, to itne hi mazarratein lata hai,do aadmiyon ki zindagi viraan ho jati hai.
Masoom bache baap ki shafaqat se ya maa ki mamta se mahroom ho jate hain aur un ki taleem-o-tarbiyat sahi tareeqe se nahi ho pati.
Do khandan jis qadar ek dusre se qareeb hue the, ab itna hi door ho jate hain aur aapas mein sakht qism ki nafratein aur kaduratein paida ho jati hain.
Isliye shari’at ibtida hi mein aise tamaam darwaze band karne ki koshish karti hai jo baad mein chal kar bahami nafrat, ikhtilaaf aur ek dusre se judai ka sabab ban sakte hain.
Talaaq ek sakht napasandeedah amal
Talaaq ek muqaddas rishta-e-nikah ko khatam karne ka naam hai.
Isliye Islam mein talaaq nihayat na pasandeedah amal hai
Rasoolullah ﷺ ne irshaad farmaya:
أَبْغَضُ الْحَلَالِ إِلَى اللَّهِ تَعَالَى الطَّلَاقُ۔(رواہ ابوداؤد عن ابن عمر :٢١٧٨)
Allah ke nazdeek halal cheezon mein sab se napasandeedah amal talaaq hai.
Hazrat Abu musa ash’ari(raziyallahu anhu) se marvi hai aap sallallahu alaihi wasllam ne bila wajha talaaq dene walon ki mazammat bayan karte hue irshaad farmaya:
لَا تُطَلَّقُ النِّسَاءُ إِلَّا مِنْ رِيبَةٍ، إِنَّ اللَّهَ – تَبَارَكَ وَتَعَالَى – لَا يُحِبُّ الذَّوَّاقِينَ، وَلَا الذَّوَّاقَاتِ(رواہ الہیثمی عن ابی موسی ٧٧٦١)
Auraton ko usi waqt talaaq di jaye jab unka kirdar akhlaqi ie’tibaar se mashkook ho: kyunkeh allah ta’ala un mardon aur auraton ko pasand nahi karte jo mehez za’iqah chakne wale hon.
Talaaq ek na khush gawar zaroorat
Is baat mein shubah nahi keh baaz aw’qaat talaaq ek na khush gawar zaroorat ban jati hai.
Talaaq ek takleef deh cheez hai; laikin baaz dafa is se ziyada takleef deh baton ko rokne ka zariya ban ti hai.
Agar miyan biwi ke darmiyan ta’alluqat na khush gawar hon, ek saath nibah dushwar hojaye, mard apni aurat se najaat pana chahta ho aur us ke liye qaid-e-nikah se bahar aane ka koi qanooni raasta na rakha jaye, to woh ghair qanooni raste ikhtiyaar karta hai aur us mein aurat ka ziyada nuqsan hai.
Baaz auqaat aise haalat paida ho jaate hain jin ki wajhe se miyan biwi ko ek dusre ke saath zindagi guzarna mumkin nahi hota.
Ek dusre se alahidah reh kar zindagi basar karne hi mein donon ke liye chain-o-sukoon aur itminaan ka samaan hota hai.
ِShari’at ek na pasandeedah zaroorat samajh kar talaaq ki ijazat deti hai
In halaat mein shari’at ek na pasandeedah zaroorat samajh kar talaaq ki ijazat deti hai.
Talaaq ek na pasandeedah amal hai; laikin izdiwaji zindagi ka woh qanoon mukammal kehlane ka mustahiq nahi jis mein rishta-e- nikah ke bandan ko kholne ki gunja’ish na rakhi gayi ho.
Miyan biwi mein nafratein paida ho jaa’ein aur be sukoni ki zindagi guzaarne lagein, na shaohar ke liye biwi se alahidah ho kar zehni sukoon hasil karne ka qanooni raasta ho, na aurat ke liye shaohar ke zulm-o-ziyadati waghairah se najat hasil karne ki koi jaa’iz surat ho.
Yeh yaqeenan ek ghair fitri baat hai, aisi be kaif-o-talkh zindagi guzarne par majboor karna, jabr-o-zulm hoga,neez aisi talkh zindagi donon ki sehet aur salahiyat par asar andaaz hoti hai.
Aaj kal hindu samaaj mein ziyada taleem yafta hone ke bawajood biwiyon ko jalane aur qatl karne ke jo waqi’aat pesh aarahe hain, woh isi ka natijah hain.
Chunkeh qanooni taor par alahidgi ko dushwar bana diya gaya hai, is liye bahut se log is tarha ke ghair qanooni raste ikhtiyar karte hain.
Islam mein talaaq ki ijazat ka mansha yehi hai, agar che yeh na pasandeedah fail hai; laikin miyan biwi ka saath chalna dushwar hojaye, to is qaid se azaad hone ke liye aisa rasta khula rakha jaa’e keh log la’qanooniyat par majboor na hon.
Neez is mein aurat ki zindagi aur us ki izzat-o-abro ke liye bhi tahaffuz ki tadbeer hai.
Talaaq ka haq mard ko diya gaya
Qudrati ie’tibaar se auratein jazbati hoti hain, yeh auraton ka aeb nahi ;balkeh un ka husn hai.
Wufoore jazbaat ke baghair be panah mahabbat karne wali maan, khub pyar karne wali biwi sabit nahi ho sakti.
Neez auratein jazbati hone ki wajeh se jald baaz hoti hain, kisi baat se jald khush bhi hojati hain aur jald naraz bhi, is liye khawateen ko islam ya kisi muhazzab samaaj mein talaaq ka haq nahi diya gaya hai.
Mard mein auraton ki banisbat quwwate faisla ziyada hoti hai, neez woh auraton ki banisbat kam jazbati hote hain.
Is wajhe se islam ne un ko talaaq ka haq diya hai aur unhi behad ehtiyaat ke saath is haq ko isti’mal karni ki talqeen ki hai
Chunanche:
Bila zaroorat talaaq dena shari’at mein sakht na pasandeedah hai, deeni mizaj aur khauf-e-khuda rakhne wale is na pasandeedah amal se bachna chahenge.
Islam ne kasbe ma’ash ki zimedari mard par rakhi hai, kasbe ma’ash ke liye woh ghar se bahar nikalta hai.
Mard chahta hai keh bachon ki nigrani-o-tarbiyat ke liye biwi ka ie’timaad hasil ho, lihaza woh talaaq ke zariye apne ghar ko viraan karna nahi chahta, is wajhe se woh talaaq se ghabra ta hai.
Talaaq ki bina par mard ko mahar, iddat ka nafaqah muta’a ladke hon, to saat(7) saal ki umar tak, ladkiyan hon, to baligh hone tak un ka kharch bardasht karna padta hain.
Yeh saari maali zimmedariyan mard par aa’ed hoti hain jo use talaaq ka qadam utha ne se rokti hain, is wajhe se mardon ko talaaq ka haq diya gaya hai.
