Shaohar ke Ghar mein Qiyam 74

Shaohar ke Ghar mein Qiyam

Shaohar ke Ghar mein Qiyam

Shaohar ka bunyaadi haq “haq-e-habs” (shaohar ke ghar mein tehre rehna) hai yani shaohar ki ijazat ke baghair aam halaat mein aurat us ghar se bahar nahi nikal sakti jo use bataure rihaa’ish gaah ke diya gaya hai.
Allah ta’ala ka irshad hai
Ae ummahatul mumineen! Apne gharon mein tehri raho aur zeenat ke saath bahar na nikla karo jaise zamana-e-jahiliyyat mein nikhla karti theen. Al ahzaab:23
Majboori ki suratein mustasna hain, masalan biwi ke walidain shadeed bimaar hain aur koi unka teemaardaar nahi hai, to shaohar ki mumana’at ke bawajood aurat ke liye walidain ki timaardaari ke liye jana jaa’iz hai.

Mekah jana

Fuqha ne likha hai : Shaohar ko chahiye keh woh waqtan fawaqtan biwi ko us ke walidain aur rishte daron se mulaqaat ke liye le jaye, ya jane ki ijaazat de, kitne dinon mein jane ki ijaazat di jaye? usme urf-o-riwaj ka ie’tibaar hoga; albattah shaohar ki taraf se ijaazat na hone ki surat mein bila ijaazat walidain se haftah do haftah mein ek martaba aur deegar mahram rishte daron se saal mein ek martaba mulaqaat ke liye ja sakti hai.

Mekah mein teherna

Jitne din shaohar ba khushi mekah mein teher ne ki ijaazat de, ya jitne din teher ne ka umoomi urf-o-riwaj ho, itne din mekah mein qiyaam kar sakti hai, jo aurat shaohar ki ijaazat-o-marzi ke baghair bila kisi jaa’iz haq aur uzr ke mekah chali jaye, ya mekah mein shaohar ki marzi-o-umoomi riwaj ke muddat se ziyadah teheri rahe. woh aurat naashizah (na farman) samjhi jaye gi aur gunaah gaar hogi aur jitna arsa mekah mein guzare gi, us muddat ke kharch ki bhi woh haq dar nahi hogi (Qamoo sulfiqh: 5/204)
Rasoolullah ne irshad farmaya
Teen aadmi aise hain keh Allah ta’ala un ki namaz qubool
nahi farmate aur na hi un ki koi neki asmaan ki taraf utha te hain:
A Bhagoda ghulam yahan tak keh woh apne aaqa ke paas laut aaye.
B Nashe mein mast insan jab tak ke nasha door na hojaye.
C Woh aurat jis ka shaohar (shar’ee uzr ki bina par) naraz ho yahan tak keh shaohar khush na hojaye.(Sahi ibne hibbaan: 12/178)
Hafiz Ibne Hajar aur Mulla ali qaari farmate hain:
Agar shaohar biwi se us ki bad akhlaqi, be adbi aur na farmani ki wajeh se naraaz ho, khah din ka waqt ho ya raat ka, jab tak shaohar biwi se khush nahi ho jata, biwi keh liye ye wa’eed baqi rahe gi
Neez jo walidain apni shadi shuda ladki ko shaohar ki marzi aur jaa’iz uzr ke baghair ghar mein tehra lete hain, woh bhi gunaah gaar honge, is tarha ki harkaton se miyan biwi ke darmiyan na ittifaqiyan aur nafratein paida hoti hain aur jhagdon ka aaghaaz hota hai jo nihayat muzir sabit hota hai.

اس خبر پر اپنی رائے کا اظہار کریں